A infraestrutura, promovida no marco do proxecto de hidróxeno renovable H2Pole, representa un avance crucial para o desenvolvemento do hidróxeno verde na comunidade galega. Conta cun investimento asociado de 8,6 millóns de euros.

O trazado proxectado, cunha lonxitude aproximada de 36 quilómetros, ten como finalidade transportar o hidróxeno renovable xerado na futura planta de H2Pole en As Pontes ata o municipio de Mugardos, enlazando así o interior co litoral.

A Xunta de Galicia xa recoñeceu esta iniciativa como proxecto industrial estratéxico (PIE). Para minimizar o impacto ambiental, o hidroducto discorrerá, na medida do posible, paralelo ao trazado do gasoduto existente na rede de transporte de gas natural. Construído en aceiro ao carbono, considérase unha infraestrutura esencial para garantir a viabilidade e o futuro desenvolvemento do ecosistema de hidróxeno verde en Galicia.

Ademais, este hidroducto é clave para o desenvolvemento do Val do Eume, o val do hidróxeno impulsado por Reganosa e Forestal do Atlántico en As Pontes e Mugardos. A primeira compañía prevé construír unha planta de produción de hidróxeno renovable nos terreos das antigas oficinas de Endesa, e a segunda pretende fabricar metanol verde nas súas instalacións da ría de Ferrol.

O val do hidróxeno foi recentemente declarado proxecto de interese común pola Comisión Europea e o Parlamento Europeo. Este recoñecemento, o máximo nivel outorgado polas institucións comunitarias, avala a solidez do proxecto e a súa importancia estratéxica no ámbito enerxético europeo. Non obstante, ambos os proxectos quedaron excluídos da liña de axudas do Ministerio de Transición Ecolóxica para os vales do hidróxeno.

As alegacións ao proxecto poderán presentarse dende este sábado, durante un prazo de 30 días. Os bens e dereitos afectados sitúanse nos municipios de As Pontes, A Capela, Cabanas, Fene, Mugardos e Ares.