O rexedor sinalou que, ante a situación de ineficacia da sociedade, optaron por "facer algo" e pasar a unha xestión "totalmente pública e directa" a través do propio Concello.

A nova estrutura implicará a incorporación de tres funcionarios para "desenvolver os traballos de turismo" con maior eficacia, segundo detallou Rey Varela, quen subliñou que a ineficacia da sociedade estaba "acreditada" por requirimentos estatais.

Noutra orde de asuntos, o alcalde referiuse ao proxecto de rehabilitación do antigo cuartel Sánchez Aguilera, cualificándoo como "un dos proxectos clave para o desenvolvemento da cidade". A pesar dos atrasos debidos a alegacións e informes sectoriais, mostrouse optimista coa súa aprobación definitiva nas próximas semanas.

Rey Varela tamén reivindicou os avances do seu goberno nos últimos tres anos, como a declaración de proxectos estratéxicos e unha ordenanza de licenzas, e valorou positivamente a recente licitación dun plan de solo industrial por parte da Xunta, concluíndo que "Ferrol está a ofertar posibilidades para ser un lugar atractivo para o investimento".