A provincia acolle esta semana dous encontros clave no Consello Galego de Relacións Laborais co obxectivo de desbloquear a negociación do convenio siderometalúrxico. Esta negociación é de vital importancia para a industria auxiliar do naval, especialmente na zona de Ferrolterra.
Tras varias xornadas de folga convocadas por CIG, CCOO e UGT, as organizacións empresariais solicitaron a mediación do Acordo Interprofesional Galego (AGA) para tentar avanzar nas conversas, que levan meses estancadas cunhas posturas moi distantes.
A proposta salarial da patronal, cun incremento do 0,50% no último ano dun convenio de catro exercicios, foi considerada insuficiente polos sindicatos. A parte social mantén a súa demanda de que a vixencia do acordo non supere os tres anos, ou que, de estenderse a un cuarto, inclúa melloras "substanciais".
Outro punto de fricción é a cesión de horas no permiso de acompañamento a familiares enfermos, que os sindicatos consideran "pouco razoable". A pesar diso, manteñen as convocatorias de folga para o 30 de xuño e o 2 de xullo, pendentes da evolución das próximas horas.
Paralelamente, estase a negociar o denominado "plus de estaleiro" na ría de Ferrol. Este complemento, que se engadirá como disposición adicional ao convenio provincial, está a ser discutido en conversas separadas, impulsadas pola dirección de Navantia.
A parte social busca unha actualización das contías deste plus, especialmente nos niveis máis baixos, e a simplificación das categorías profesionais existentes, unha proposta xa trasladada ás empresas en decembro.
