O acto de clausura do Programa Integrado de Emprego (PIE) do Concello das Pontes, promovido xunto cos Concellos das Somozas e A Capela, tivo lugar hoxe na Casa Dopeso. A delegada da Xunta en Ferrol, Martina Aneiros, e o alcalde das Pontes, Valentín González Formoso, presidiron o evento. A Consellería de Emprego, Comercio e Emigración financiou a iniciativa cun investimento de 140.000 euros.
Este itinerario formativo permitiu mellorar a empregabilidade dun centenar de persoas en situación de desemprego. O programa centrouse en colectivos con necesidades de apoio específicas, como persoas con discapacidade, en risco de exclusión social, migrantes, maiores de 52 anos ou menores de 30 anos.
A delegada territorial destacou que o PIE acadou un 40% de inserción laboral e animou aos participantes a aproveitar a formación recibida para mellorar as súas oportunidades profesionais.
Os programas integrados de emprego como o das Pontes inclúen actividades de orientación e asesoramento personalizado, formación, técnicas de motivación, desenvolvemento de habilidades sociolaborais e obradoiros para a preparación de entrevistas. Tamén se traballa no contacto co tecido empresarial, a prospección de oportunidades e a posibilidade de realizar prácticas profesionais non laborais.
Cada proxecto conta cun equipo técnico especializado, cuxos custos salariais e de Seguridade Social son subvencionados. Ademais, cóbrense gastos derivados de desprazamentos, materiais ou subcontratación de formación.
