A xornada puxo en valor a conexión entre as prazas de abastos, a gastronomía e os produtos de proximidade, destacando o papel destes espazos como motores de dinamización económica e puntos de encontro.
O conselleiro José González, acompañado polo director xeral de Comercio e Consumo, Gabriel Alén, e pola delegada territorial da Xunta en Ferrol, Martina Aneiros, sinalou que as prazas de abastos son moito máis ca lugares de compra, configurándose como espazos polivalentes que acollen iniciativas de dinamización e actividades gastronómicas.
O evento, celebrado na recentemente rehabilitada nave da Peixaría, reuniu a profesionais da restauración, hostalaría e comercio, e incluíu o showcooking Diálogos de cociña e mercado, a cargo do chef Adrián Pérez, do restaurante Sinxelo. Durante a demostración, elaboráronse catro propostas a partir de produtos frescos do mercado.
González referiuse á capacidade das prazas de abastos para actuar como motores de comercio de atracción, contribuíndo a revitalizar o tecido económico das vilas e cidades e a atraer visitantes. Sinalou que o futuro destes espazos pasa por combinar a tradición coa innovación e a adaptación aos novos hábitos de consumo.
Destacou tamén a estreita relación entre os profesionais da restauración e os comerciantes e praceiros, baseada na proximidade, a confianza e o coñecemento do produto, buscando achegar esa calidade e variedade á cidadanía.
A iniciativa ‘Prato de Mercado’ forma parte das actuacións recollidas no Plan Estratéxico do Comercio de Galicia 2025-2030, que aposta pola promoción das prazas de abastos e a configuración da Rede de Mercados Excelentes de Galicia.
