A nova fragata, segunda das cinco unidades previstas no programa F-110, foi posta a flote con catro meses de adianto respecto ao calendario inicialmente previsto. A xornada reuniu a representantes institucionais, responsables de Navantia, membros da Armada, traballadores do estaleiro e numerosos veciños da comarca.
O presidente provincial subliñou a importancia deste acontecemento para o sector naval de Ferrolterra, unha industria estratéxica para a economía da provincia da Coruña pola súa capacidade de xeración de emprego e o seu papel no desenvolvemento tecnolóxico e industrial.
A Deputación da Coruña destaca o programa F-110 para garantir a continuidade da actividade dos estaleiros ferroláns, impulsar a innovación e fortalecer o tecido de empresas auxiliares que participan na construción destes buques.
O programa F-110, que contempla a construción de cinco fragatas de última xeración, constitúe un dos principais proxectos industriais e tecnolóxicos en marcha en Galicia e reforza a posición de Ferrol como un dos grandes centros de construción naval militar de Europa.
