Dos 193 puntos que sumou o equipo, 17 foron aportados por Toimil. Seis puntos acadounos grazas á oitava praza na proba de lanzamento de disco, mentres que once logrouos coa terceira posición no concurso de lanzamento de peso.

A competición tivo lugar nas pistas de Gaetà Huguet en Castellón. Toimil iniciou a súa participación o sábado co lanzamento de disco, onde a pesar de non ser a súa especialidade e de partir cunha marca modesta, alcanzou os 46,96 metros, o que lle valeu a oitava praza entre trece participantes.

No lanzamento de peso, a atleta de Ferrolterra obtivo mellores resultados. Accedía á proba cunha das mellores marcas e, tras un primeiro intento de 16,76 metros que a situou cuarta, no terceiro lanzamento acadou os 17,15 metros, ascendendo unha posición na clasificación xeral.

O equipo feminino do Playas de Castellón completou o podio, mentres que o título na categoría masculina foi tamén para o equipo anfitrión.