A secretaria xeral de Emprego e Relacións Laborais, Susana Pérez Iglesias, visitou recentemente en Narón as instalacións do Grupo Intaf, especializado en enxeñería e servizos metalmecánicos, e en Cabanas as de Automoción Vilar do Colo, dedicada á reparación e mantemento de vehículos.
Durante as visitas, nas que tamén participou o presidente de APE Galicia, José Ramón Caldas, puxo de relevo a importancia destas empresas na xeración de postos de traballo e na dinamización da economía local. Subliñou a necesidade da colaboración público-privada para afrontar retos como a cobertura de vacantes laborais.
Pérez Iglesias recalcou a aposta do Goberno galego pola formación para o emprego, deseñando programas flexibles e adaptados ás necesidades do mercado laboral. O obxectivo é facilitar que as empresas atopen os perfís cualificados necesarios para mellorar a súa competitividade.
Destacou tamén o modelo autonómico de atracción de talento, que se enfoca tanto nas persoas galegas residentes no exterior como en traballadores de terceiros países, ademais de impulsar o mercado laboral interno. Unha das prioridades é garantir a remuda xeracional nos distintos sectores.
Neste sentido, mencionou diversas liñas de apoio para a contratación de mozas e mozos, como a axuda para a primeira experiencia profesional en empresas (con 7,7 millóns de euros), o programa Galicia Suma Talento: Emprégate (4 millóns de euros) ou o programa Investigo (máis de 4,8 millóns de euros) para a contratación de menores de 30 anos en investigación, tecnoloxía e innovación.
Ademais, a Xunta promove a remuda xeracional nos negocios co Bono Remuda, que conta cun orzamento de 1,5 millóns de euros, como parte dun paquete único de axudas específicas para autónomos que suma case 41 millóns de euros.
A visita a Narón tamén incluíu a sede do Grupo Cándido Hermida, dedicado ao deseño e fabricación de mobiliario para espazos comerciais, oficinas e hoteis, así como a Asesoría Prego, que ofrece xestións empresariais na zona.
