A Casa da Cultura de Valdoviño acolle ata o vindeiro 9 de outubro a mostra ‘Terceiro asalto’. Esta exposición presenta unha selección de traballos realizados por máis de 200 estudantes da Escola Técnica Superior de Arquitectura da Coruña, que plantexan solucións e melloras para o contorno do embalse de As Forcadas. O foco dos alumnos centrouse neste "mar interior" de Valdoviño, afastándose da liña costeira.
Esta é a terceira edición dunha iniciativa que se considera excepcional, xa que a Universidade da Coruña adoita manter as súas asignaturas de Proxectos en cada lugar durante dous anos. Os proxectos anteriores centráronse no contorno natural de Monte Campelo, no núcleo urbano máis poboado, e nas áreas do areal de Vilarrube e Porto do Cabo.
Nesta ocasión, os futuros arquitectos abordaron a problemática do eucalipto no embalse, considerando que supón unha ameaza paisaxística. Os proxectos buscan fomentar a interacción entre o visitante e o lugar, propoñendo novos sendeiros, miradoiros de madeira e refuxios. Tamén se reformularon as instalacións do Club Náutico, cuxa actividade se viu afectada pola calidade da auga.
A segunda parte do traballo de campo trasladouse a Pazos, na parroquia de Loira, preto dun regato que alimenta o pantano. Alí, os estudantes traballaron cunha parcela libre de eucaliptos, que conta cunha casa de pedra en ruínas e está rodeada de plantacións de especies autóctonas como castiñeiros e carballos.
Un dos exercicios centrouse na idea dunha residencia para persoas en formación agroforestal e agrícola, reflexionando sobre o avance do eucalipto. Outra práctica propuxo un novo uso para a antiga igrexa de San Pedro de Loira, un edificio tardogótico do século XV en estado ruinoso, suxerindo a súa conversión nun espazo escénico ou pequeno teatro.
A mostra reúne 14 propostas de estudantes como Lucía Álvarez, Ibrahim Aga, Nerea Castro, Camila Flores, Susana Fugarolas, Rafael Gómez, Pedro Landín, Antón Ramos, Marta Ramos, Lena Rodríguez, Ainhoa Santiso, Carmen Troncoso e Lucía Velo. Tamén participaron os docentes Juan Creus, Mario Di Felice, Emma López, Carlos Martínez e Emilio Rodríguez.
O profesor Luis Walter Muñoz Fontenla, da Escola Técnica Superior de Arquitectura da Coruña, amosou a súa satisfacción pola materialización de ideas, mencionando proxectos xa aprobados polo pleno municipal como o de Monte Campelo e a recuperación do Camiño do Plantío e a Casa da Bastona, financiados con fondos europeos Next Generation. Sinalou como retos futuros mellorar a calidade do embalse e retomar o proxecto do club náutico.
