A directora xeral de Mobilidade, Judit Fontela, defendeu no Parlamento de Galicia a amplitude da oferta de transporte público por estrada entre Ferrol e A Coruña. Fontela lamentou que o Goberno central non atenda as necesidades de conexión ferroviaria da área ferrolá, unha demanda que a Xunta e colectivos cidadáns sosteñen desde hai tempo.
Segundo sinalou a directora xeral, a desatención estatal no eido ferroviario converte o autobús na única alternativa de mobilidade para Ferrol. Por iso, a Xunta fai un seguimento especial das necesidades e reforza os servizos nas horas de maior demanda, ademais de utilizar vehículos de gran capacidade. Non obstante, Judit Fontela incidiu en que, como acontece en todos os transportes públicos, non sempre será posible ofrecer praza a todas as persoas nunha saída concreta, aínda que se presten os servizos previstos e se incorporen reforzos.
A conexión entre Ferrol e A Coruña suma nos días laborables 60 servizos diarios, 30 en cada sentido, que totalizan 4.000 prazas. A oferta deseñada pola Xunta concentra moitos servizos nas horas de maior demanda para atender os horarios laborais e educativos.
Así mesmo, Judit Fontela defendeu o labor da Xunta para velar polo cumprimento dos contratos de transporte público por estrada e garantir a calidade do servizo á cidadanía, mediante inspeccións e campañas anuais de avaliación.
