Este orzamento inclúe actuacións xa en marcha para frear a banda marrón do piñeiro, cun custo superior aos 970.000 euros. Estes traballos concéntranse nos montes de A Capelada e Couce, de utilidade pública e propiedade do Concello de Cedeira, así como no monte A Braxe, que pertence á comunidade autónoma de Galicia.
As intervencións consisten en rozas, claras e podas das masas forestais co fin de mellorar a súa saúde, reducir a competencia entre os exemplares e diminuír a súa vulnerabilidade ante pragas e enfermidades. Ademais, estase a levar a cabo unha selección xenética de árbores que mostran resistencia a estas doenzas.
“"Este orzamento inclúe unha futura inversión de 1,5 millóns de euros para rexenerar 228 hectáreas nestes montes, unha cantidade que forma parte dunha partida global de 2,5 millóns destinada a repoboacións con piñeiro silvestre e rodales de frondosas autóctonas no Distrito Forestal I – Ferrol."
A Consellería subliñou que estas accións forman parte do compromiso da Xunta na loita contra a banda marrón do piñeiro. Por segundo ano consecutivo, o Goberno autonómico ofrece tratamentos gratuítos para afrontar esta enfermidade. Ao longo de 2026, prevese actuar en montes de xestión privada, cubrindo aproximadamente 4.000 hectáreas, ademais dos traballos en montes de xestión e utilidade pública afectados.
Finalmente, a Consellería defendeu a valorización do monte galego desde unha perspectiva económica, social e ambiental, mediante unha xestión activa e sostible.
