O Concello das Somozas conseguiu, por cuarto ano consecutivo, tres ‘Flores de Honra’ na súa participación no programa ‘Vilas en Flor Galicia’, que este ano contou con 40 concellos inscritos. A gala tivo lugar no Auditorio Municipal de Salceda de Caselas.
Este certame, impulsado pola Fundación Juana de Vega, recoñece a traxectoria e as accións dos municipios galegos na mellora e potenciación dos espazos verdes urbanos, a súa xestión sostible, a educación ambiental e a concienciación cidadá. O programa busca a posta en valor da riqueza natural e paisaxística.
A avaliación do xurado tivo en conta o patrimonio vexetal e paisaxístico, a sostibilidade ambiental, as actividades sociais e turísticas, a comunicación e o impacto visual. Destacouse o especial coidado pola limpeza e as áreas verdes no núcleo das Somozas, así como o colorido e bo mantemento dos xardíns do concello e da casa da cultura.
Tamén se valorou a integración da área recreativa ao bordo do río, con zonas de merendeiro e xogo para nenos, e as intervencións en “O Seixidal”, un espazo etnográfico que inclúe a plantación de froiteiras e un pequeno anfiteatro.
Desde o goberno local destacaron a importancia deste recoñecemento para "poñer en valor a xestión sostible, a educación ambiental e a concienciación da veciñanza" e amosaron o seu orgullo pola continuidade do galardón.
