A alcaldesa de Silleda, Paula Fernández Pena, recolleu onte este distintivo no acto institucional celebrado no Pazo de Santa Cruz de Rivadulla, no municipio de Vedra. A rexedora estivo acompañada polo concelleiro de Transición Ecolóxica, Manuel Requeijo, e a tenenta de alcaldesa, Mónica González. Con esta nova distinción, Silleda consolida unha traxectoria iniciada en 2024, converténdose nun dos 5 municipios da provincia de Pontevedra que obtiveron o selo este ano.
Paula Fernández destacou a importancia de manter este recoñecemento durante tres anos consecutivos, sinalando que "demostra que o noso compromiso coa sustentabilidade non responde a actuacións illadas, senón a unha maneira de entender a xestión municipal, na que a protección do medio ambiente e a mellora da calidade de vida da veciñanza deben ir da man". Subliñou ademais a responsabilidade de "conservar esa riqueza e, ao mesmo tempo, impulsar un modelo de desenvolvemento que sexa respectuoso co territorio e coas xeracións futuras".
A renovación da Bandeira Verde dá continuidade ao traballo desenvolvido polo Concello en diferentes ámbitos da xestión ambiental. Entre as iniciativas destacan o Plan de Mobilidade Urbana Sostible (PMUS), o Plan de Acción polo Clima e a Enerxía Sostible (PACES), o proxecto da Rede de Calor con Biomasa, e a xestión dos residuos, onde Silleda foi pioneira na comarca co contedor marrón e a compostaxe doméstica.
O concelleiro de Transición Ecolóxica, Manuel Requeijo, destacou que "esta terceira Bandeira Verde é o resultado dun traballo continuado no tempo, que combina planificación, investimentos e medidas concretas para facer de Silleda un concello cada vez máis sostible". Engadiu que "a sustentabilidade constrúese tamén desde o día a día, mellorando a separación dos residuos, promovendo o aforro enerxético, impulsando a compostaxe ou concienciando sobre a importancia de coidar a nosa contorna".
A concesión da Bandeira Verde de Galicia supón tamén un incentivo para continuar desenvolvendo novas iniciativas e constitúe un mérito á hora de optar a determinadas axudas autonómicas vinculadas á protección do patrimonio natural e á xestión dos residuos. A rexedora lembrou que o Concello de Silleda vén realizando importantes investimentos con fondos propios para mellorar as infraestruturas de abastecemento e saneamento, especialmente no rural.
Nesta edición, un total de 39 concellos galegos acadaron a Bandeira Verde, dos que só cinco pertencen á provincia de Pontevedra. A Xunta prevé dar prioridade aos concellos recoñecidos con esta distinción para acceder a futuras liñas de axudas, entre elas as relacionadas coa xestión da auga.
