O titular de Sanidade, xunto coa directora xeral de Recursos Humanos do Servizo Galego de Saúde, Mar Pousa, supervisou o desenvolvemento das probas de acceso ás categorías de médico asistencial do 061, terapeuta ocupacional, dietista-nutricionista e electricista do Servizo Galego de Saúde no Recinto Feiral Internacional de Silleda.
Das 1.202 persoas admitidas neste procedemento, un total de 936 opositores acudiron á realización das probas. En concreto, na categoría de médico asistencial do 061 realizaron o exame 95 dos 139 admitidos; na de terapeuta ocupacional, 208 dos 273 admitidos; na de dietista-nutricionista, 330 dos 363 admitidos; e na de electricista, 303 dos 427 admitidos.
As prazas ofertadas distribúense da seguinte forma: 8 para médico asistencial do 061, 11 para terapeuta ocupacional, 45 para dietista-nutricionista e 11 para electricista.
Con esta xornada conclúe o calendario de exames de oposición organizado polo Servizo Galego de Saúde durante este outono, no que se convocaron probas para acceder a un total de 2.223 prazas.
