A mostra incluíu actividades de recreación histórica que achegaron ao público a cultura romana e castrexa. A expedición estivo integrada por 173 participantes de 16 asociacións vinculadas ao Arde Lucus, que agrupan arredor dun milleiro de persoas. Na delegación tamén participaron a alcaldesa de Lugo, Elena Candia, e os concelleiros Damián Carballo e Agustín Gallego, caracterizados para a ocasión.
O programa de actividades comezou cun desfile polas instalacións da feira e unha demostración do tradicional ritual da queimada, incorporada a petición da organización de INTUR. Posteriormente, a comitiva trasladouse ao centro de Valladolid cun desfile desde a praza de Colón ata a praza Maior, onde foron recibidos polo alcalde da cidade, Jesús Julio Carnero.
“"Durante o encontro tivo lugar unha demostración da carga entre castrexos e romanos e, no marco da recepción institucional, a alcaldesa de Lugo entregoulle ao rexedor vallisoletano dous agasallos representativos das culturas protagonistas do Arde Lucus: un puñal romano e un trisquel castrexo."
A participación en INTUR tamén serviu para presentar a próxima edición do Arde Lucus, que se celebrará os días 17, 18, 19 e 20 de xuño de 2027, e dar a coñecer esta celebración fóra de Galicia. O Concello de Lugo agradeceu a acollida recibida en Valladolid e recoñeceu a implicación das asociacións participantes, cuxo traballo é fundamental para manter viva a festa.
