A Deputación de Pontevedra trae á XXIX Mostra de Artesanía de Agolada tres espectáculos da man do circuíto +Escénicas, unha iniciativa provincial destinada a apoiar a programación cultural nos concellos de menos de 20.000 habitantes. As representacións terán lugar nos Pendellos.
O martes 11 de agosto, ás 18:00 horas, será a quenda de Charlatán Rodríguez, un proxecto do artista Félix Rodríguez. Este espectáculo familiar narra a historia dun charlatán que chega á vila coa súa lingua afiada e remedios para todos os males, ofrecendo solucións inútiles e ilusións.
O mércores 12 de agosto, a xornada comezará ás 12:00 horas con Auga e Terra: a pel do territorio, unha peza de danza de Giovanni Peixoto e Inés Piñeiro. Posteriormente, ás 18:00 horas, presentarase Flash, de Dani García, que narra as aventuras dun fotógrafo ambulante.
Auga e Terra: a pel do territorio naceu a partir dunha invitación para inaugurar a nomenclatura do GDR Terra e Auga e expandiuse coa colaboración da coreógrafa Marion Sage e do director de teatro visual Wagner Cintra.
Flash transporta ao público a hai máis dun século cun fotógrafo ambulante. Os obxectivos cobran vida e as imaxes rebelan, convertendo cada fotografía nunha aventura na que a maxia, o humor e o teatro xestual son protagonistas.
O circuíto +Escénicas, que xa vai pola súa terceira edición, responde a unha demanda histórica do sector profesional. A institución provincial incrementou o seu orzamento nun 36%, alcanzando os 204.000 euros nesta anualidade. Cada concello pode solicitar ata cinco actuacións do catálogo de máis de 600 propostas, cun réxime de cofinanciamento que varía segundo o tamaño do municipio.
