O presidente da Xunta, Alfonso Rueda, destacou hoxe a importancia da feira como "un gran escaparate" da marca "Galicia Calidade". Este evento estratéxico consolídase cunha participación sen precedentes, superando as cifras de hai case dúas décadas.
Na inauguración da 48ª edición, Rueda estivo acompañado polo conselleiro de Presidencia, Xustiza e Deporte, Diego Calvo, e pola conselleira do Medio Rural, María José Gómez. O xefe do Executivo autonómico subliñou a "gran transformación" experimentada polo certame nos últimos anos, que se reflicte nun "aumento dos niveis de participación, internacionalización e profesionalización".
A pesar da súa evolución, a feira mantén a súa esencia ligada ao sector primario, ao tempo que soubo adaptarse para acoller a grandes empresas, segundo sinalou a Xunta nun comunicado.
