Estas xornadas, que teñen a arte como elemento vehicular, comezarán o vindeiro sábado, 11 de abril, no Centro Xove da Almáciga. A iniciativa, en colaboración coa Unidade de Atención ás Migracións (Ami), pretende rebater o discurso de polarización e a situación dos países empobrecidos, nun contexto global de conflitos e tensións.

A programación inclúe a Escola de activismos e a participación da banda Hip-hop Femenino de El Salvador, integrada no proxecto Activistas polo mundo que queremos. Esta actividade, aberta a maiores de 16 anos, desenvolverase entre as 17:00 e as 19:00 horas. Tamén se contará coa presenza de Elena Romero, de Barracón Digital, que desde Honduras ofrecerá o obradoiro Software libre no teu peto o 21 de abril, de 18:00 a 20:00 horas, no mesmo centro.

A Casa das Máquinas será outro dos puntos neurálxicos, acollendo contacontos, conversas e proxeccións de curtametraxes. O 8 de maio, a artista compostelá Adela Vázquez impartirá un obradoiro de creación de relatogramas, dirixido a persoas e colectivos que desexen documentar e difundir a súa memoria e reivindicacións a través do debuxo. Nesa mesma xornada, presentaranse 14 proxectos que recibiron subvención municipal para o desenvolvemento, impulsada pola Concellaría de Dereitos e Servizos Sociais, dirixida por María Rozas.

Ademais, 'Compostela + solidaria' incluirá unha oferta lúdica familiar co espectáculo de contacontos Historias dun mundo grande, a cargo de Bandullo Azul, e unha sesión de curtametraxes. Tamén se lembrará ao pobo palestino a través das acuarelas das cisxordanas Nour e Anwar Abu Rayan, que reflicten as consecuencias do xenocidio sufrido.

A Escola de activismos completarase cun encontro en liña coa organización internacional More in Common, que abordará a polarización nos discursos e comportamentos actuais. María Paz subliñou a importancia da corresponsabilidade e a defensa dos dereitos, fronte aos discursos da ultradereita que cuestionan a cooperación internacional e rexeitan aos migrantes.