A maxistrada Ana López-Suevos Fraguela considera que existen indicios sólidos de que os investigados lideraron unha estratexia financeira para protexer o capital da empresa fronte aos seus acredores, incluíndo a Facenda, a Seguridade Social e os propios traballadores.
Segundo o auto xudicial, que asume as teses da UDEF e a Inspección de Traballo, o grupo funcionaba cunha "unidade de caixa" onde os ingresos desviábanse a sociedades interpostas para evitar embargos, prexudicando especialmente aos empregados que non cobraban as súas nóminas.
A resolución sinala que, mentres os empregados acudían ao FOGASA, os directivos mantiñan os seus salarios a través deste circuíto de contas. Entre as sociedades implicadas figuran Código Televisión SL, Anova Multiconsulting SA, Think First SL e a Asociación Agrupación Deportiva El Correo Gallego.
A investigación tamén salpica ás cónxuxes dos directivos, María Fátima O.B. e María Carmen R.A., por indicios de coñecemento da manobra. Tamén se investiga a Ricardo A.F. e a mercantil ASEMALI INVERSIONES S.L. por actuar como testaferros no aluguer da sede.
O auto detalla unha débeda esixible de 961.849,33 euros á Seguridade Social para Editorial Compostela S.A. en maio de 2022, sumándose a outras obrigas. A débeda co persoal en outubro de 2020 xa alcanzaba os 4,7 millóns de euros.
