A Rede de Bibliotecas Públicas de Galicia organiza un novo itinerario cultural para achegar a cidade aos seus veciños e visitantes. A actividade, dirixida por Mercedes Espiño Amil, céntrase na figura de Francisco Asorey (Cambados, 1889 - Compostela, 1961), un dos escultores galegos máis senlleiros do século XX.
Na capital galega, onde o artista residiu dende 1918 ata o seu falecemento, identificáronse e localizado polo menos 66 das súas creacións. Estas obras son de diversa índole, incluíndo monumentos públicos como o dedicado a San Francisco, pezas de carácter privado accesibles ao público en institucións como a Facultade de Medicina ou o Pazo de Fonseca, ademais de numerosas pezas en coleccións particulares.
O itinerario, denominado 'espazos de Asorey', propón un percorrido por diferentes recunchos composteláns onde as súas obras dialogan coa contorna. O obxectivo é revelar tanto pezas sobranceiras que adoitan pasar desapercibidas como lugares intimamente ligados á traxectoria vital do escultor.
A ruta inclúe paradas significativas como o petador do Pazo de Vaamonde, placas conmemorativas a Bernardo Barreiro de Vázquez Varela e Enrique Mayer, a tumba do cardeal Martín de Herrera, o conxunto monumental de San Francisco, ou o capitel e o escudo do Hotel Compostela, reivindicando así o forte vínculo de Compostela con Asorey.
Mercedes Espiño Amil, licenciada en Filoloxía Galego-Portuguesa pola Universidade de Santiago de Compostela, é unha recoñecida activista da lingua e do ensino. Ao longo da súa carreira, obtivo varios premios á innovación educativa e publicou diversas obras didácticas e teatrais, ademais de colaborar en medios como Andaina, Raiola, a Revista Galega de Educación, a Gran Enciclopedia Gallega, Sermos e Nós Diario. Entre as súas publicacións destacan Espazos de Rosalía en Compostela (2021) e a súa contribución a Unha manda de pezas para Isaac (2020).
A actividade está pensada para público xuvenil e adulto, cun máximo de 25 participantes. As persoas interesadas poderán retirar o convite no mostrador de información da biblioteca dende 30 minutos antes do comezo.
