O director xeral de Comercio e Consumo, Gabriel Alén, presidiu onte en Santiago de Compostela a reunión do xurado dos Premios Artesanía de Galicia 2026. Nesta edición, seleccionáronse tres propostas finalistas que optarán ao premio principal, dotado con 9.000 euros.
As pezas finalistas son 'Ambaxes', unha escultura en madeira de carballo de Aitor Martínez López de Arbina (obradoiro Aitor., Tomiño); 'Choiva', unha instalación téxtil de Luisa Estévez Rodríguez e Óscar Montero Lasagabaster (obradoiro Belategui Regueiro, Cambre); e 'Estruga', unha peza de alta xoiería inspirada no litoral galego de Alberto Blanco Taboada (obradoiro Alberto Taboada, Maside).
O xurado, composto tamén por Laura Fontenla, Antonio Suárez Martín, Miriam Pérez Fernández, Alberto Añón Corral e Jonatan Sarachaga Casalderrey, valorou as candidaturas conforme aos criterios establecidos nas bases reguladoras.
Os Premios Artesanía de Galicia, impulsados pola Xunta, buscan recoñecer o talento e a traxectoria dos profesionais do sector, estimular a creatividade e contribuír á mellora da profesionalización. Nesta edición tamén se concederán tres Bolsas Eloy Gesto, dotadas con 4.000 euros cada unha, para artesáns menores de 45 anos.
O Premio Traxectoria 2026, de carácter honorífico, distinguirá un profesional cunha carreira consolidada. Os nomes das persoas gañadoras das tres categorías daranse a coñecer nun acto público que terá lugar en Santiago de Compostela o vindeiro 4 de decembro.
