A formación municipalista Por Chantada - Interior Galego Vivo esixiu responsabilidades polos recentes cortes de subministro eléctrico que afectaron o municipio. Tras dous incidentes significativos que deixaron sen luz a miles de usuarios, a entidade rexistrou sendos escritos dirixidos ao Concello e á Consellería de Economía e Industria.
O primeiro dos apagamentos tivo lugar o xoves 11, ás 21:23 horas, e non se repuxo o subministro ata pasadas as 01:00 da madrugada do venres, afectando a 3.700 usuarios. Dous días despois, o domingo, outro corte prolongouse dende as nove da noite ata as 02:13 da madrugada do luns, deixando sen enerxía a 3.500 clientes da distribuidora Naturgy.
Dende Por Chantada denunciaron que "nun dos concellos que máis enerxía produce do país, as incidencias na rede afectaron a milleiros de persoas abonadas", sumando un total de máis de nove horas de interrupción acumulada.
Nun dos concellos que máis enerxía produce do país, as incidencias na rede afectaron a milleiros de persoas abonadas.
A formación reclama "unha explicación detallada sobre as causas reais das incidencias, os investimentos realizados na rede eléctrica e as medidas previstas para evitar que estes episodios se repitan". Ademais, solicitan a intervención do Concello e da Xunta ante a distribuidora eléctrica.
Por último, lembraron que Chantada, a pesar de soportar desde hai décadas os impactos asociados aos encoros de Belesar e Os Peares, os aproveitamentos hidroeléctricos, as liñas de evacuación de parques eólicos e os propios parques Serra do Faro I e II, continúa sufrindo problemas de subministración eléctrica.
