A Oficina Municipal de Turismo do Concello de Chantada organizou este ano unha ambiciosa programación co obxectivo de poñer en valor as potencialidades da localidade como Municipio Starlight. As actividades, que se desenvolveron ata o pasado 4 de setembro, contaron cunha ampla participación e consistiron en seis propostas gratuítas.
A oferta incluíu un obradoiro práctico de iniciación á astronomía dirixido a empresarios e emprendedores do sector turístico, xornadas de guiado e observación do ceo nocturno, unha charla divulgativa sobre a eclipse solar e un curso de astrofotografía. O alcalde, Manuel Lorenzo Varela, destacou o alto seguimento destas iniciativas, subliñando a importancia de divulgar recursos turísticos como o ceo nocturno. "Contamos cunha elevada participación da veciñanza e tamén de persoas de fóra que aproveitaron a súa estancia en Chantada para asistir ás actividades ou ben viñeron a propósito porque lles gusta a astronomía. As prazas dispoñibles enchéranse o que demostra o interese no noso ceo nocturno e as potencialidades que nos ofrece", afirmou.
O obradoiro de iniciación á astronomía orientouse a achegar coñecementos básicos aos profesionais turísticos para que puideran incorporar este recurso ás súas ofertas. Pola súa banda, o curso de astrofotografía, celebrado o 4 de setembro, permitiu aos participantes aprender técnicas e ferramentas para captar o ceo nocturno, aproveitando as condicións que ofrece Chantada para este tipo de fotografía.
Desde a Oficina Municipal de Turismo realízanse enquisas de valoración entre os asistentes, nas que se reflicte a boa acollida das actividades e un notable interese pola astronomía. "Estes resultados reforzan a aposta de Chantada polo astroturismo como recurso turístico complementario, capaz de diversificar a oferta do municipio, atraer novos públicos e poñer en valor as condicións do territorio para a observación do ceo nocturno", concluíu o rexedor.
