Na actividade, Diego Castro explicou o papel do ISSGA na prevención de riscos no sector forestal, subliñando a importancia de adoptar hábitos seguros nos traballos no monte. Tamén deu a coñecer o material divulgativo da entidade para o sector, como guías técnicas e sobre equipos de protección individual (EPI) obrigatorios e recomendados para postos como motoserristas, operarios de poda en altura, rozadoira, peóns forestais, maquinistas e transportistas.
O técnico do ISSGA fixo especial énfase na necesidade de consultar sempre a Avaliación de Riscos de cada posto, seguir os procedementos de traballo, respectar a vida útil dos equipos e escoller EPIs cómodos e ergonómicos.
Con esta xornada, o Obradoiro de Emprego Ulla-Umia reforza o seu compromiso coa seguridade, buscando que os aprendices adquiran non só competencias técnicas forestais, senón tamén coñecementos fundamentais para protexerse no traballo.
