O Concello de Valga está a impulsar a mellora das súas infraestruturas deportivas coa renovación integral do alumeado e da pista de tenis das instalacións de Campaña. O proxecto, que xa se atopa en fase de licitación, prevé a subministración e instalación de 64 proxectores de luz LED de alta eficiencia para optimizar a iluminación do complexo.
Ademais, a pista de tenis será obxecto dunha reforma completa. Retirarase o pavimento actual para substituílo por un novo con base de saburra compactada e formigón. A intervención tamén contempla a colocación dunha canle de drenaxe perimetral, unha varanda de protección e portas de acceso, ademais da dotación da rede, postes e marcado das liñas de xogo regulamentarias.
Esta actuación responde ao obxectivo municipal de modernizar as instalacións deportivas, fomentar a práctica do deporte e corrixir o estado de deterioro dalgunhas infraestruturas. O orzamento total para estas melloras ascende a 110.659,14 euros, que serán financiados a través do Plan Extraordinario de Infraestruturas deportivas da Deputación de Pontevedra.
As empresas interesadas en optar á adxudicación destas obras teñen de prazo ata o vindeiro 14 de decembro para presentar as súas ofertas.




