O Goberno autonómico está a desenvolver e impulsar este paquete de obras co obxectivo de mellorar a capacidade de reacción dos tramos de río máis sensibles a eventuais asolagamentos e protexer á vez os recursos, os equipamentos públicos e a poboación das contornas. O presidente da Xunta, Alfonso Rueda, destacou que a planificación e a prevención son claves para facer fronte ao contexto de cambio climático, garantindo a seguridade da veciñanza e reducindo ao máximo os posibles efectos dunha inundación.
A conselleira de Medio Ambiente e Cambio Climático, Ángeles Vázquez, asegurou que estas intervencións buscan que Galicia estea "mellor preparada e protexida fronte as inundacións". As obras chegarán a 43 km de ríos e beneficiarán a 8.900 veciñas e veciños.
Entre as principais intervencións previstas atópase a mellora estrutural no rego Maior, en Sada, cun investimento de 7 M €, que se executará grazas a un convenio co Concello. Outros proxectos con tramitación avanzada inclúen actuacións no río Valga, no rego Tarrío (Padrón), e nos ríos Miñor e Zamáns (Gondomar). Tamén se impulsan áreas de inundación controlada en Pontevedra e Ponteceso.
Ademais, Augas de Galicia traballa noutras actuacións como as intervencións nos ríos Valga e Soutiño, e no río Belelle (Neda), cun custo estimado de 1,4 M €. Destacan tamén tres actuacións cun investimento duns 8 M €: a creación dunha área de inundación controlada en Pontevedra, actuacións na ARPSI do río Anllóns (Ponteceso-Cabana de Bergantiños), e a mellora do río Sar en Padrón.
A estas suman as xa executadas na ARPSI Ulla-Sar (Valga) e na ARPSI río Anllóns (Carballo), así como unha intervención en obras no río Fontecova (Viveiro). En total, mellorarase o comportamento hidráulico de 43 km de ríos, reducindo o risco de danos sobre bens e equipamentos públicos cun valor estimado de 72 millóns de euros.
Estas actuacións enmárcanse no Plan de xestión do risco de inundación de Galicia-Costa 2021-2027 e no proxecto de orzamentos de Augas de Galicia para 2027, que destina 27,2 M € a reforzar a protección fronte aos efectos do cambio climático.
