O alumnado da especialidade de forestais do Obradoiro de Emprego de Valga continúa a desenvolver diversas actuacións de acondicionamento e conservación ambiental en espazos públicos, zonas verdes e áreas de valor patrimonial e natural do municipio. Estes traballos permiten aos participantes poñer en práctica os coñecementos teóricos adquiridos durante o seu período de formación, ao tempo que prestan un servizo á comunidade.
Entre as intervencións máis destacadas atópanse a posta a punto do Parque Irmáns Dios Mosquera, onde realizaron labores de limpeza, acondicionamento e podas de mantemento, e da lagoa Mina Mercedes. Nesta última, centráronse na eliminación de especies vexetais invasoras, principalmente mimosas e acacias, para favorecer a rexeneración da flora autóctona e garantir a preservación do ecosistema local.
O equipo do obradoiro tamén se desprazou á área fluvial de Vilarello, onde se executaron traballos de seguridade e limpeza. Retiráronse varias árbores que presentaban risco de caída e outros exemplares xa mortos.
Outros puntos de actuación son o miradoiro do Muíño de Vento de Beiro, a contorna do pavillón de Cordeiro e o xacemento arqueolóxico Igrexa Vella, a carballeira de Campaña e taludes da ponte sobre a vía do tren e os arredores da depuradora municipal. Nestes espazos realizaron labores de roza, limpeza e coidado.
