A sesión comezou cunha charla sobre a correcta separación das distintas fraccións do lixo, abordando que residuos depositar en cada contedor e cales deben trasladarse ao punto limpo. Torres tamén informou sobre os servizos dispoñibles para a veciñanza, como a recollida selectiva, o punto limpo fixo en Campaña, o punto limpo móbil e o servizo de recollida de residuos voluminosos.
Outro dos eixos da xornada foi a xestión dos residuos orgánicos mediante a compostaxe, un sistema implantado no municipio no ano 2020. Actualmente, a rede municipal dispón de máis de 1.000 composteiros domésticos e sete centros de compostaxe comunitaria.
Mediante este proceso natural de descomposición, a materia orgánica transfórmase en abono natural que evita o uso de fertilizantes químicos.
Para pechar a xornada, o grupo desprazouse ata o centro de compostaxe comunitaria da Avenida da Coruña, onde os participantes puideron comprobar in situ as explicacións teóricas recibidas, analizando o estado do proceso e a calidade do compost en diferentes fases.
O alumnado amosouse moi interesado e participativo, formulando preguntas sobre a compostaxe e a xestión de residuos en xeral.
