A obra, pertencente ao circuíto +Escénicas da Deputación, será representada pola compañía Teatro dos Ghazafelhos ás 12:00 horas. Esta iniciativa provincial busca apoiar a programación cultural nos concellos de menos de 20.000 habitantes.
H2..Oh! preséntase como un laboratorio científico teatralizado, dirixido a maiores de 6 anos. A proposta, baseada no libro homónimo de María Canosa gañador do Premio Follas Novas 2021, conta coa propia autora como divulgadora científica e o matrimonio Curie (representado por Teatro Ghazafelhos) como protagonistas.
A través do humor e a curiosidade científica, os tres personaxes realizarán experimentos xunto co público para levar a teoría á práctica. O circuíto +Escénicas, que xa vai pola súa terceira edición, conta cun orzamento de 204.000 euros e cofinánciase entre a Deputación e os concellos participantes.
