A Deputación de Pontevedra deu luz verde ao proxecto de mellora da seguridade viaria na estrada provincial EP-8201 Moraña - Santa Xusta - Couso, situada no concello de Moraña. A actuación, cun orzamento de preto de 265.000 euros, centrarase nun tramo de 240 metros entre Moraña e Santa Xusta que presenta deficiencias de seguridade debido á escaseza de espazo para vehículos e peóns.
A intervención prevé unha ampliación integral da plataforma da estrada para optimizar as condicións de circulación. Isto implicará a construción de novos muros de contención de pedra, que substituirán os actuais e asegurarán a estabilidade da vía. Tamén se renovará a rede de recollida de augas pluviais con novas tubaxes soterradas e arquetas, ademais dunha cuneta de formigón para unha correcta drenaxe e conservación.
O proxecto tamén inclúe a execución dun novo firme nas zonas de ampliación e a renovación da capa de rodaxe en todo o tramo. Complementarase coa instalación de novas barreiras de seguridade e a actualización da sinalización horizontal e vertical. Unha vez finalizadas as obras, reporanse os servizos afectados, como subministro eléctrico, telecomunicacións e abastecemento, e limparase a contorna.
“"Trátase dunha actuación integral que nos permitirá transformar este tramo da estrada nun espazo máis seguro, cómodo e mellor preparado para as necesidades actuais da veciñanza e dos usuarios da vía."
