Considerado os 'Xogos Olímpicos da música', o World Music Contest (WMC) celébrase cada catro anos na localidade de Kerkrade, nos Países Baixos. Este certame, que atrae a máis de 20.000 músicos e 300.000 asistentes, é un referente internacional desde a súa primeira edición a principios dos anos 50.
A Banda de Música Municipal de Caldas de Reis acadou un fito ao ser seleccionada para participar na División de Concerto, a categoría máis alta do campionato. Porén, para facer realidade este soño, a agrupación precisa da implicación da sociedade e do tecido empresarial local, xa que as achegas do Concello e da Deputación de Pontevedra non son suficientes para cubrir os elevados custos de desprazamento, instrumentos, partituras e billetes.
A expedición estará formada por entre 70 e 80 músicos de diferentes idades. Para moitos deles, ademais da experiencia que suporía tomar parte nun evento desta magnitude, tamén será a súa primeira actuación lonxe de casa.
A banda estima que necesita entre 70.000 e 80.000 euros para poder viaxar ao WMC, que se celebrará nos primeiros días de agosto. Por iso, ademais de iniciativas como a venda de rifas, os seus responsables fan un chamamento á cidadanía para que colabore mediante ingresos na conta bancaria ES64 2080 5019 4830 4001 4580.
Desde o seu debut en 2005, a Banda de Música Municipal de Caldas de Reis construíu un palmarés notable, incluíndo o primeiro premio na 2ª sección do Certame Internacional de Bandas de Música Cidade de Valencia en 2024. Baixo a dirección de Javier Penide desde 2021, a banda confía en cubrir os custos para impulsar a súa traxectoria internacional. Ata o momento, só a Banda Unión Musical de Meaño (BUMM) logrou un galardón para Galicia neste certame en 2013. Nesta edición, que celebra o 75 aniversario do WMC, tamén participará a Banda de Música de O Rosal.
