Os empregados, que levan meses sen percibir os seus salarios, quixeron facer visible a delicada situación desta empresa de derivados da madeira, que posúe plantas tanto en Curtis como en Vilasantar.
Queremos traballar, non mendigar
Esta foi a mensaxe principal dunha pancarta que encabezou a protesta, na que participaron os traballadores xunto co comité de empresa. A mobilización contou co apoio da CIG, sindicato que alertou sobre as graves consecuencias para a economía local.
A representación sindical subliñou que a maioría do cadro de persoal está composto por veciños da zona, cuxo consumo habitual é fundamental para sustentar o comercio local e a economía da comarca.
“"Moitos dos traballadores e das traballadoras somos veciños e veciñas destes concellos. Vivimos aquí, consumimos aquí e co noso traballo sustentamos o comercio local. A perda destes empregos tería consecuencias directas en toda a economía da zona."
Os afectados advertiron que o posible peche das fábricas podería obrigar a moitas familias a buscar oportunidades laborais fóra da rexión, o que tería un impacto negativo significativo no tecido social e económico das localidades afectadas.
