A data límite do 29 de abril para o preconcurso de acredores do grupo Losán, que posúe instalacións en Curtis e Vilasantar, foi o foco dun debate no Senado. Tanto o grupo popular como o socialista alertaron sobre a urxencia da situación, subliñando que “o tempo se esgota” e que os empregados levan meses sen percibir os seus salarios.
“"O 29 de abril claro que é unha data crave. Hai que actuar de maneira urxente e deixar de falar."
A senadora do PP, Rosa Galego, impulsora da iniciativa, criticou a postura do PSOE, que presentou un texto alternativo e se abstivo na votación. Galego insistiu na necesidade dunha intervención inmediata, argumentando que o “impacto económico excede claramente o ámbito municipal e autonómico”, e que o Executivo Central, a través dos ministerios competentes e da SEPI, debe liderar unha solución industrial viable para preservar a actividade e o emprego.
Pola súa banda, Rafael Rodríguez Villarino, senador socialista, cualificou a proposta de “extemporánea”, cuestionando a súa efectividade a tan só 13 días da data límite. Villarino defendeu que o Estado xa actuou, mencionando unha axuda de 35 millóns de euros e avais da SEPI por 19 millóns de euros. Avogou por continuar impulsando as canles de comunicación entre a SEPI e a dirección de Losán para culminar o plan de reestruturación da débeda de forma coordinada.
“"Non dou crédito. Quedo coa boca aberta. Os traballadores están sen cobrar e a empresa está a piques de pechar o día 29."
A moción aprobada insta o Goberno a convocar urxentemente unha mesa de traballo institucional co consello de administración de Losán, os representantes dos traballadores e as administracións autonómicas afectadas. Tamén pide que a SEPI exerza plenamente as súas funcións en empresas estratéxicas, avaliando o plan de viabilidade e activando os instrumentos de apoio necesarios. Finalmente, reclama unha coordinación efectiva entre os ministerios e que se atenda formalmente o acordo unánime dos concellos galegos afectados.
