O BNG, a través do seu deputado Néstor Rego, rexistrou diversas iniciativas no Congreso dos Deputados co obxectivo de que o Goberno central asuma o seu compromiso coa protección e posta en valor do Castelo de Corbeiroa. Este complexo de ruínas, declarado Ben de Interese Cultural (BIC) no ano 1949, atópase nun estado de conservación "preocupante", a pesar dos recentes e "insuficientes" traballos de limpeza.
Ademais da conservación, os nacionalistas urxen a garantir o acceso público a este enclave, situado en pleno dominio público marítimo-terrestre entre os municipios de Bergondo e Sada, na provincia da Coruña. Rego subliñou que os terreos que rodean o castelo son propiedade do albergue xuvenil de Gandarío, dependente da Xunta de Galicia, o que está a impedir o libre tránsito pola zona.
“"Esta situación vulnera completamente a normativa de patrimonio cultural galego e a lexislación estatal en materia de costas. É especialmente grave que non se respecte a servidume de tránsito que debe asegurar unha franxa libre para a circulación peonil ao longo da costa."
O deputado nacionalista reclama ao Executivo que actúe para "facer cumprir a lei e garantir o dereito dos cidadáns ao uso e goce do dominio público marítimo-terrestre". Insiste en que é unha obriga legal manter esa zona de tránsito e que corresponde ao Goberno velar polo seu cumprimento.
