O betanceiro Miguel Santos Fernández, actual director de Tecnoloxía de MasOrange, foi galardoado co título de Enxeñeiro do ano 2026 nos Premios Galicia das Telecomunicacións e da Sociedade da Información. Este recoñecemento, outorgado polo Colexio Oficial de Enxeñeiros de Telecomunicación de Galicia, premia a traxectoria dun profesional destacado no sector.

O xurado destacou a "brillante traxectoria profesional" de Santos e o seu papel "clave" na transformación, integración e expansión das "infraestruturas e servizos de conectividade en España". Tamén se valorou o seu "impulso á innovación e o desenvolvemento tecnolóxico" e a forma en que levou "tan lonxe os valores da enxeñaría".

Dende abril de 2024, Miguel Santos lidera a área de Tecnoloxía de MasOrange, supervisando unidades como Rede, Sistemas, Data, Operacións e Ciberseguridade. Forma parte do comité executivo da compañía e dirixe un equipo duns 1.300 profesionais.