O director xeral de Gandaría, Agricultura e Industrias Agroalimentarias, José Balseiros, visitou hoxe as instalacións da cooperativa Aranxes no concello de Aranga. Esta entidade, dedicada á produción agraria e gandeira, foi beneficiaria no 2025 dunha axuda de máis de 200.000 euros para a adquisición de maquinaria agrícola en réxime asociativo.
En concreto, a empresa recibiu financiamento para a compra dun tractor e de dúas trituradoras agrícolas. Estas novas máquinas buscan reducir custos de produción, aumentar a seguridade para o operario, permitir a agricultura de precisión e lograr unha maior eficiencia medioambiental. Nos últimos anos, Aranxes xa recibira máis de 1,8 millóns de euros en axudas de maquinaria asociativa.
Estas achegas promoven o uso de equipamentos agropecuarios en réxime asociativo e fomentan a introdución de novas tecnoloxías. Ademais, favorecen a racionalización de custos de mecanización, incrementan a seguranza no traballo, reducen emisións contaminantes e fomentan o aforro enerxético, co obxectivo de mellorar a calidade de vida no medio rural.
Balseiros destacou que a Consellería do Medio Rural aposta polo cooperativismo agrario como ferramenta clave para incrementar a competitividade das explotacións e dinamizar o territorio. A modernización do sector, segundo sinalou, mellora a rendibilidade e a calidade de vida no rural galego. Aranxes, con preto de 800 hectáreas de cultivo e unha produción anual de máis de 15.000.000 litros de leite, é un exemplo deste potencial.
A convocatoria de axudas do pasado ano destinou 6 millóns de euros a un total de 61 empresas do sector agrogandeiro. Impulsáronse dúas convocatorias: unha primeira con 3,6 millóns para 27 cooperativas e unha segunda con 2,4 millóns para outras 34 entidades.
