A Romaría de San Xoán do Coto será o punto de partida dun verán que percorrerá Galicia co obxectivo de recuperar verbenas con forte arraigo veciñal e valor cultural. Este proxecto, que xa vai pola súa quinta edición dende 2022, busca apoiar as tradicións festivas do rural galego.
Como novidade este ano, cada verbena contará coa participación dun grupo ou banda local para abrir a xornada, fortalecendo a identidade de cada celebración e dando visibilidade ao talento musical da contorna. Un dos momentos destacados será a interpretación do himno de Ortiga ao inicio da festa.
A xornada festiva comezará coa sesión vermú ás 13:30 horas, amenizada polo grupo Deluxe, procedente da localidade veciña de Miño. Pola tarde, a partir das 19:30 horas, a Orquestra Galilea subirá ao escenario para ofrecer un amplo repertorio musical, convidando ao baile e á convivencia, elementos esenciais das festas galegas.
Esta edición tamén pon o foco na sustentabilidade, coa instalación de puntos de reciclaxe e o uso de mobiliario fabricado con materiais reciclados ou de baixo impacto ambiental. Ademais, promóvense accións de dinamización local, como a creación de camisetas personalizadas e o apoio na difusión dos eventos.
O programa 'A Nosa Verbena' estenderase por toda a xeografía galega, con oito paradas seleccionadas nas catro provincias. Ademais de San Xoán do Coto, inclúense celebracións en Pontevedra, Ourense e Lugo, buscando representar a diversidade festiva e apoiar ás comunidades que manteñen vivas estas tradicións.
