A terceira aula engadida ao centro, cuxas obras se executaron durante o verán, permitirá dar resposta á demanda das familias e facilitar a conciliación no municipio. O delegado territorial da Xunta en Lugo, Alfonso Villares, visitou as instalacións e destacou o impacto desta mellora.
Villares lembrou que o servizo é gratuíto para os usuarios grazas á achega autonómica, que o curso pasado xa destinou 30.100 euros para cubrir os custos das 30 prazas existentes entón.
Durante a súa visita, Alfonso Villares e o alcalde, Pablo Taboada, tamén abordaron outras actuacións previstas na localidade, como a urbanización da terceira fase do polígono industrial, que sumará case 40.000 metros cadrados á superficie actual para atender a demanda de solo empresarial.
Ademais, o programa Rural Activo 2026 achegará preto de 162.000 euros ao Concello para a contratación de nove traballadores durante nove meses en tarefas de prevención de incendios e xestión de biomasa.
Tamén se repasaron investimentos en infraestruturas viarias e ambientais, como os 91.800 euros do Plan Camiña Rural para mellorar accesos en Campo Maior, Lestedo e Outeiro de Burdallos, e outros 47.500 euros do PIR para pavimentar camiños en Vilaspesa.
