A deputada de Política Social da Deputación da Coruña, Mar García Vidal, visitou a sede da Fundación Hospitalarias Betanzos para facer entrega dun novo vehículo. Este coche facilitará os desprazamentos das persoas usuarias do seu Centro Ocupacional Integrado na Comunidade (COIC), que atende a 18 persoas con discapacidade intelectual procedentes de Betanzos, Abegondo, Oza-Cesuras e Cambre.
O obxectivo principal do vehículo é facilitar a participación destas persoas en actividades deportivas, culturais, ocupacionais e de lecer na súa contorna. "A inclusión tamén consiste en poder saír, participar nos mesmos espazos que o resto da veciñanza", sinalou García Vidal, destacando o apoio ao traballo da fundación para que os usuarios desenvolvan as súas capacidades e gañen autonomía.
O Centro Ocupacional Integrado na Comunidade, situado na praza García Hermanos de Betanzos, iniciou a súa andaina en 2024 como unha iniciativa pioneira en Galicia. Combina actividades ocupacionais e prelaborais con propostas de deporte, cultura e lecer, compartindo espazos coa veciñanza para fomentar o desenvolvemento de habilidades sociais e a participación activa na comunidade.
A Fundación Hospitalarias Betanzos, anteriormente coñecida como Centro Pai Menni, conta cunha longa traxectoria na atención a persoas con discapacidade dende 1923. Actualmente, ofrece servizos residenciais, vivenda tutelada, centro de día e centro ocupacional, atendendo a máis de 300 persoas cun equipo multidisciplinar.
