O Concello de Curtis avanza cara á ampliación das dotacións públicas na capital municipal, Teixeiro. Tras alcanzar un acordo cos propietarios do emblemático restaurante Casa Miraz, o goberno local adquirirá unha parcela urbana de 1.939 metros cadrados que conta con tres edificacións que suman 811 metros cadrados construídos. A operación atópase na súa fase final e formalizarase legalmente nos próximos días.

Segundo fontes municipais, o obxectivo desta adquisición é dotar a Teixeiro de novas infraestruturas que melloren a calidade de vida da cidadanía. O equipo de goberno xa está a traballar nun proxecto de rehabilitación integral do inmoble. A idea é transformalo nun espazo moderno e accesible que acolla unha ampla variedade de servizos públicos, con usos culturais, formativos, sociais e xuvenís.

Estas mesmas fontes sinalan que, con esta iniciativa, o Concello reafirma o seu compromiso co desenvolvemento urbano sostible e coa descentralización e o reforzo dos servizos públicos. Tamén apuntan que a compra suporá unha reactivación do contorno.