A Casa da Cultura de Carral será o escenario, ás 20.00 horas, da primeira xornada deste evento cultural. A película, que toma como punto de partida a experiencia persoal de Gómez en 1989, cando se opuxo ao servizo militar obrigatorio e foi encarcerado na Prisión Militar de Caranza en Ferrol, busca xerar unha reflexión sobre a resistencia non violenta.
“"De maneira organizada en todo o estado fumos a devolver as nosas cartillas militares aos cuarteis. Eu fun co meu compañeiro Ricardo Conde dos primeiros e ao longo dese ano presentáronse tres máis en Galicia."
O director subliña a importancia do humor como ferramenta para afrontar situacións difíciles, mesmo durante o seu período en prisión. A pesar da dureza da experiencia, Gómez emprega o humor para analizar a situación, destacando que "o humor e o amor" son esenciais para entender a vida. O documental tamén establece paralelismos coa actualidade, marcada por conflitos bélicos, e convida a reflexionar sobre a ineficacia das armas para resolver disputas.
A concelleira de Cultura de Carral, Isabel López, resaltou a relevancia de impulsar a industria audiovisual galega, especialmente no ámbito do documental. Segundo López, este tipo de iniciativas non só dan visibilidade á lingua galega, senón que tamén permiten ao público achegarse á non ficción e valorar a calidade dos documentais. O ciclo, que celebra a súa quinta edición, inclúe tamén as proxeccións de Onde máis doe, sobre a violencia vicaria, e Basal, que explora o poder da música na saúde.
