A situación do transporte público entre Betanzos e A Coruña volveu xerar un forte malestar no municipio, levando ao goberno local a reiterar a súa demanda de solucións "urxentes" á Xunta de Galicia. Os responsables municipais subliñan que as dificultades non se limitan ao primeiro anel da área metropolitana, senón que as conexións do segundo anel, especialmente as de Betanzos coa capital, "seguen dando día si e día tamén problemas".

A alcaldesa María Barral destacou que a escaseza de información sobre horarios, a incerteza de saber se o autobús pasou ou non, e os constantes atrasos son problemas cotiáns. A esta situación sumouse recentemente o feito de que "o bus nin tan sequera apareceu pola parada deixando en terra aos usuarios de primeira hora sen ningunha explicación", unha situación que o concello considera "inadmisible".

Barral asegurou que a institución municipal comparte o malestar dos usuarios, quen, a pesar dos intentos, non puideron contactar coa compañía nin recibiron "ningunha información". Por este motivo, Betanzos trasladou directamente a situación á Dirección Xeral de Mobilidade, non só para informar, senón para "esixir que dunha vez por todas se melloren os servizos".

A rexedora solicitou a convocatoria dunha nova mesa de seguimento, similar á celebrada este martes cos municipios do cinto metropolitano. Barral argumenta que "é necesario abordar estes problemas con urxencia, xa que pasan os meses e segue sen haber solucións, e os concellos estamos abonando cantidades económicas importantes e non podemos ser uns meros convidados de pedra, debemos de esixir que o servizo funcione como o facía antes de que a Xunta levase a cabo todos os cambios que fixo".