As familias empadroadas no Concello de Curtis xa poden solicitar as novas axudas para o fomento da natalidade. A iniciativa, que busca apoiar as unidades familiares e fixar poboación no municipio, ofrece achegas de ata 300 euros por fillo ou filla.
O prazo para presentar as solicitudes estará aberto dende este mércores, 14 de outubro, ata o 1 de decembro de 2026. Esta liña de apoio está dirixida ás familias que tiveron ou adoptaron fillos ou fillas entre o 16 de novembro de 2025 e o 15 de novembro de 2026.
O Concello destina un orzamento total de 10.500 euros a esta medida. No caso de que o número de solicitudes supere os fondos dispoñibles, a contía repartirase de xeito igualitario entre todas as persoas beneficiarias.
“"É un paso máis para fixar poboación no noso concello e loitar contra a despoboación do rural. É un incentivo e unha axuda para que os nenos e nenas das nosas familias poidan medrar no noso municipio. Ademais de impulsar os servizos públicos municipais de conciliación e educación, tamén cremos que é importante colaborar no importante esforzo económico que supón ter un fillo."
Para poder optar a estas axudas, polo menos un dos proxenitores debe estar empadroado no Concello de Curtis no momento do nacemento ou adopción, e manter dito empadroamento durante un mínimo de cinco anos xunto co menor. Este último deberá convivir coa persoa solicitante. Ademais, os beneficiarios deberán estar ao corrente das súas obrigas tributarias coa Facenda, a Seguridade Social, a Deputación e o propio Concello. No caso de adopcións, a idade máxima do menor será de dez anos.
As solicitudes poderanse presentar na Casa do Concello de Teixeiro, nas oficinas municipais de Curtis ou a través da sede electrónica. Será necesario achegar documentación como o DNI e o libro de familia ou a certificación literal de nacemento. O certificado de convivencia será xestionado de oficio polo Concello. Esta axuda é compatible con outras de similar finalidade concedidas por outros organismos públicos.
