A actuación, que se estenderá durante os próximos seis meses, céntrase na mellora estrutural da baliza e no acondicionamento da súa contorna. O proxecto inclúe a creación de novos accesos, a instalación de miradoiros e a habilitación dunha área de aparcamento para os visitantes.
Entre as melloras específicas no faro, que entrou en servizo en 1920, atópanse a substitución da escaleira interior, optimización do sistema eléctrico, pintado da porta, restauración da fachada e reforzo da pintura e estrutura da varanda da terraza. A escultura do percebeiro será recolocada preto das cruces brancas, reforzando o seu vínculo coa historia e tradición local.
“"As obras son o resultado dunha petición expresa realizada polo Goberno local co obxectivo de poñer en valor unha das zonas máis importantes e representativas do municipio. Esta actuación nace da estreita colaboración entre a Autoridade Portuaria e a administración municipal de Ponteceso."
Na contorna, prevese a creación de dúas estruturas de aceiro e reixa para miradoiros, un novo acceso ao faro con varanda de aceiro inoxidable, e unha varanda de postes de madeira unidos por cordas. Tamén se instalará unha escaleira para acceder ás rochas desde o miradoiro, realizaranse traballos de limpeza e movemento de terras, e colocarase mobiliario urbano xunto a un aparcamento.
O proxecto de restauración foi deseñado cunha premisa fundamental: o respecto absoluto pola natureza. A intervención busca garantir que a contorna do Faro do Roncudo, coñecido polo "ronquido" continuo do mar, manteña a súa riqueza paisaxística e medioambiental intacta.
