A delegada da Xunta na Coruña, Belén do Campo, destacou hoxe o apoio do Goberno autonómico á contratación de socorristas nos concellos da comarca de Bergantiños e Costa da Morte. Grazas a unha orde de axudas da Consellería de Presidencia, Xustiza e Deportes, 11 concellos desta zona recibiron preto de 111.000 euros para financiar este servizo esencial durante a tempada estival.
A liña de axudas, que conta cunha dotación total de 1,5 millóns de euros, beneficiará a 186 concellos e mancomunidades en toda Galicia. O obxectivo principal é garantir a seguridade nas praias, piscinas e outras instalacións acuáticas descubertas durante os meses de maior afluencia.
A provincia da Coruña, con maior número de zonas de baño, é a que máis contía recibe, cun total de 530.000 euros distribuídos entre 56 concellos. A delegada informou que, especificamente, na comarca de Bergantiños e Costa da Morte, estes apoios permitiron contratar persoal para garantir a vixilancia e o salvamento.
Estas subvencións concédense en réxime de concorrencia competitiva e están destinadas á prestación do servizo de vixilancia, rescate e salvamento nos espazos acuáticos naturais ou instalacións acuáticas descubertas de titularidade municipal entre o 1 de xuño e o 30 de setembro. O Goberno galego busca así fomentar que os municipios poidan ofrecer este servizo nas épocas de maior demanda.
As axudas poden financiar tanto o persoal propio das entidades locais como persoas desempregadas contratadas a través de empresas externas. Os profesionais deben estar inscritos no Rexistro Profesional do Persoal de Socorrismo de Galicia, onde constan máis de 4.800 profesionais.
Na concesión das achegas tivéronse en conta criterios como o número de zonas de baño, a adhesión ao Plan específico de salvamento en praias (Sapraga), a poboación total, o número de bandeiras azuis ou contar coa declaración de municipio turístico galego.
A Xunta contribúe así a fomentar a prestación deste servizo, que é competencia dos concellos, non só con axudas para a contratación, senón tamén coa oferta de cursos de formación para incrementar o número de profesionais na comunidade.
