A delegada da Xunta na Coruña, Belén do Campo, acompañada polo alcalde de Malpica, Eduardo Parga, e pola directora do centro, Ana Seoane, anunciou hoxe a renovación do ascensor do CEIP Milladoiro. Esta actuación conta cun investimento de máis de 36.000 euros, enmarcada no Plan Ben_Estar 2026, co obxectivo de ofrecer espazos educativos máis seguros, funcionais e inclusivos.
O novo equipamento substituirá ao antigo elevador, reforzando a seguridade e a accesibilidade do centro, que conta con 154 alumnos. A intervención consistirá na instalación dun ascensor cunha capacidade para oito persoas e tres paradas, facilitando a comunicación entre as diferentes plantas do edificio. Incorporará ademais un sistema de nivelación de precisión e comunicación bidireccional na cabina.
Entre as melloras inclúense portas automáticas telescópicas de dúas follas con acabado en aceiro inoxidable, que garanten a accesibilidade universal. Espérase un aforro enerxético do 75% e que o novo ascensor estea operativo o vindeiro mes de outubro.
Belén do Campo destacou o compromiso da Xunta coa mellora dos centros educativos públicos, subliñando que "investir na calidade das infraestruturas educativas é investir no benestar do alumnado e do profesorado, así como nun ensino público de maior calidade".
Este plan de mellora prevé un paquete de 329 obras en toda Galicia cun importe de 7,2 millóns de euros. Na provincia da Coruña, o Plan Ben_Estar contempla 162 obras por case 2,8 millóns de euros. Na comarca de Bergantiños-Costa da Morte, realizaranse 35 actuacións nos concellos de Malpica, Cabana de Bergantiños, A Laracha, Coristanco, Laxe, Camariñas, Carballo, Cee, Corcubión, Dumbría, Ponteceso, Vimianzo, Zas cun investimento superior a 630.000 euros.
