A iniciativa conxunta busca dous obxectivos principais: a eliminación total das peaxes na AG-55 e a implementación dun programa de mellora do firme para corrixir deficiencias e puntos de acumulación de auga. Esta medida é considerada esencial para a seguridade das persoas usuarias da vía.

Os socialistas lembran que a AG-55, a primeira autoestrada construída integramente en Galicia, foi inaugurada en dúas fases: o tramo A Coruña-A Laracha en 1993 e a extensión ata Carballo en 1997. Destacan que a inauguración da segunda fase se realizou “nun acto sorpresa, de noite e con presenza policial”, co fin de evitar a protesta da veciñanza que xa daquela reclamaba a súa gratuidade.

A Xunta de Galicia é a titular desta infraestrutura, cuxa concesión foi outorgada a Autoestradas de Galicia por un período de 50 anos, con vixencia ata o ano 2045. Os partidos promotores da moción critican que a AG-55 quedase fóra do rescate de catro autoestradas autonómicas aprobado no Consello da Xunta do 10 de outubro de 2024, que supuxo un investimento de 297 millóns de euros.

As tarifas actuais da AG-55 varían, sendo de 2,60 euros entre Carballo e A Coruña, 1,35 euros entre Paiosaco e Carballo, 1,30 euros entre Arteixo e A Laracha, e 0,85 euros entre A Laracha e Carballo. Consideran que as bonificacións aplicadas pola Xunta non son suficientes para compensar a “débeda histórica” coa Costa da Morte.

En canto á seguridade viaria, os socialistas alertan sobre o trazado de 32 quilómetros entre Carballo e A Coruña, que inclúe 51 curvas, algunhas delas consideradas perigosas. Denuncian o mal estado do firme, con “rebacheos, tramos deteriorados e acumulación de auga en días de choiva”, o que incrementa o risco de aquaplaning e perda de control dos vehículos.