Un total de 157 veciños e veciñas maiores de 60 anos participaron activamente nestas accións formativas gratuítas, organizadas pola Concellaría de Terceira Idade. Ao longo do curso actual, impartíronse 100 horas de formación distribuídas en 10 grupos, chegando a distintas parroquias e espazos municipais para facilitar a asistencia.

O último curso tivo lugar na parroquia de Goiáns, no novo centro social de Xoane, onde os participantes recibiron a visita do alcalde, Daniel Pérez; a concelleira de Terceira Idade, Mar Eirís, e o concelleiro de Participación Veciñal, Ramón Varela. O remate final dos obradoiros programados terá lugar na aula Cervantes do mercado municipal de Carballo.

Estas iniciativas forman parte do programa municipal Remocea, que busca a viabilidade e dinamización do rural. Os obradoiros descentralizáronse en centros sociais con mínimo de inscritos, chegando a Rus, Imende, Bértoa, Verdillo, Razo e Goiáns, ademais dos catro cursos impartidos na propia cidade de Carballo.

Os cursos de telefonía móbil teñen unha traxectoria consolidada en Carballo desde o ano 2019, en colaboración coa Cruz Vermella. Durante estes sete anos, centos de persoas maiores do municipio superaron a fenda dixital, gañando autonomía. Dada a excelente acollida e a demanda constante, a Concellaría de Terceira Idade prevé continuar con estas accións formativas.