A Sección Quinta da Sala do Contencioso-Administrativo do Tribunal Supremo estimou os recursos presentados pola Xunta, Greenalia e a Asociación Eólica de Galicia, anulando así a decisión do Tribunal Superior de Xustiza de Galicia (TSXG) de 2023 que suspendera o proxecto do parque eólico do Bustelo. O tribunal galego considerara que existira unha fragmentación ilegal do proxecto, unha tese que agora o Supremo rexeita.

O Alto Tribunal baseou a súa decisión nos argumentos xa aplicados en marzo de 2025 nun caso similar, o do parque Campelo, tamén entre Santa Comba e Coristanco. O Supremo sinalou que os motivos expostos en ambos os recursos de casación eran idénticos e as cuestións de interese casacional obxectivo tamén. Esta sentenza anterior serviu para reafirmar a postura do Supremo sobre a tramitación ambiental realizada pola Administración autonómica.

O tribunal avaliou a tramitación da Xunta lembrando que "o feito de que dúas ou máis instalacións de parques eólicos compartan instalacións de conexión non implica, de xeito ineludible, que exista un único proxecto aos efectos da súa avaliación ambiental". Polo tanto, no caso do Bustelo, o Supremo considera que procede reafirmar os criterios xurisprudenciais xa fixados.

En consecuencia, o Supremo considera que a sentenza do Tribunal Superior de Galicia se afastaba da doutrina xurisprudencial establecida e non se axustaba ao dereito, polo que foi revogada. Confírmase así a legalidade do acordo administrativo que autorizou o parque eólico do Bustelo, cunha potencia de 45 megawatts e un investimento previsto de 45 millóns de euros. A resolución do TSXG, que estimara un recurso da organización ecoloxista Adega, quedou sen efecto.

Tanto este fallo do Supremo como unha sentenza do Tribunal de Xustiza da Unión Europea (TJUE) de 2025, que deu a razón á Xunta na tramitación de parques eólicos ao non considerar obrigatorio facer públicos os informes sectoriais, foron acollidos con satisfacción polo sector eólico. Aseguran que se abre a porta ao desbloqueo de proxectos que estaban suspendidos cautelarmente polo TSXG, aínda que decenas de parques seguen paralizados por motivos ambientais.

Neste contexto, a nova presidenta da Sala do Contencioso-Administrativo do TSXG, María Azucena Recio González, apartou ao maxistrado Luís Villares da sección terceira da Sala, que paralizara numerosos proxectos eólicos, para trasladalo á sección cuarta. Estes movementos, que afectan catro maxistrados, foron recorridos ante o Consello Xeral do Poder Xudicial (CGPJ).