A situación de alerta por escaseza na conca do río Anllóns levou ao Concello de Carballo a intensificar as medidas de aforro de auga. A demanda hídrica aumenta significativamente durante o verán, especialmente nas zonas costeiras, onde o consumo pode chegar a triplicarse.
Desde principios de xullo, o consistorio xa adoptara accións como a suspensión de baldeos, o corte da subministración a fontes ornamentais, a redución da frecuencia de regos e a priorización de plantas de baixo consumo nos parques e xardíns. "Temos que ser moi conscientes de que a auga é un recurso limitado e de que cada pequeno xesto conta", sinalou o concelleiro de Medio Ambiente, Miguel Vales.
Os datos da empresa concesionaria, Gestagua, revelan que entre o 14 de xullo e o 17 de agosto tratáronse 233.954 metros cúbicos de auga. Aínda que os rexistros diarios non mostran un incremento sostido, os datos históricos evidencian unha forte variación estacional nas zonas costeiras.
En áreas como Razo, Baldaio e Pedra do Sal, o consumo facturado no terceiro trimestre foi máis de tres veces superior ao do primeiro, cun incremento do 211,8 %. No conxunto do municipio, o aumento foi do 9,8 %.
Esta presión adicional na costa concéntrase nos meses de menor caudal dos ríos, o que fai "especialmente importante extremar o aforro", segundo Vales. Ademais, unha parte da franxa costeira aínda non dispón de abastecemento municipal, polo que os rexistros non reflicten a totalidade da demanda.
O Concello tamén monitoriza a rede de abastecemento, cuxo rendemento hidráulico se mantivo estable, superando o 75%. "Non estamos diante dun problema de abastecemento inmediato, senón dunha situación que nos obriga a anticiparnos e a protexer o recurso", concluíu o concelleiro.
